एक घटनालाई लिएर एसपी कवित कटवालमाथि आलोचना, तर सयौं सफल काम किन ओझेलमा ?
जिल्ला प्रहरी कार्यालय मोरङका एसपी कवित कटवाल पछिल्लो समय एक खानतलासी घटनालाई लिएर आलोचनाको केन्द्रमा परेका छन्। तर, सुरक्षा निकायका जानकारहरू र स्थानीय तहका धेरै सरोकारवालाले प्रहरीको कामको मूल्याङ्कन गर्दा समग्र कार्यसम्पादनलाई पनि हेर्नुपर्ने धारणा राखेका छन्।
प्रहरीले प्राप्त हुने सूचनाका आधारमा अनुसन्धान र खानतलासी गर्नु कानुनी प्रक्रियाको हिस्सा हो। कुनै सूचनाको सत्यता पुष्टि नहुँदा अपेक्षित वस्तु वा प्रमाण फेला नपर्न पनि सक्छ। त्यसलाई मात्र आधार बनाएर सम्पूर्ण प्रहरी संगठन वा नेतृत्वको नियतमाथि प्रश्न उठाउनु उचित नहुने मत व्यक्त गरिएको छ।
एसपी कटवालको नेतृत्वमा मोरङमा लागूऔषध नियन्त्रण, चोरी–डकैती नियन्त्रण, फरार अभियुक्त पक्राउ, शान्ति–सुरक्षा व्यवस्थापन तथा विभिन्न अपराध अनुसन्धानमा उल्लेखनीय काम भएका उदाहरणहरू पनि छन्। यस्ता सफल कार्यहरू सार्वजनिक चर्चामा कम आउने तर एउटा विवादास्पद घटना भने सामाजिक सञ्जालमा तीव्र रूपमा फैलिने प्रवृत्ति देखिएको छ।
सामाजिक सञ्जालमा आलोचना हुनु लोकतान्त्रिक अभ्यासको हिस्सा भए पनि कुनै पनि विषयमा तथ्य र प्रमाणका आधारमा निष्कर्षमा पुग्नुपर्ने आवश्यकता सरोकारवालाले औंल्याएका छन्। एउटै घटनालाई लिएर व्यक्तिको सम्पूर्ण कार्यकालको मूल्याङ्कन गर्नु न्यायोचित नहुने उनीहरूको भनाइ छ।
प्रहरी स्रोतका अनुसार कुनै पनि सूचना प्राप्त भएपछि कानुनी प्रक्रिया पालना गर्दै अनुसन्धान अघि बढाइन्छ। यदि सूचना गलत सावित भयो भने त्यसबाट आवश्यक सिकाइ लिएर भविष्यमा अझ प्रभावकारी रूपमा काम गर्ने दायित्व पनि संगठनको हुन्छ।
सुरक्षा विज्ञहरूका अनुसार समाजले गल्ती भए त्यसको रचनात्मक समीक्षा गर्नुपर्छ, तर निरन्तर भएका सकारात्मक कामलाई पनि समान रूपमा मूल्याङ्कन गर्न आवश्यक छ। एउटा घटनाले सयौं राम्रो कामलाई पूर्ण रूपमा ओझेलमा पार्नु भन्दा सन्तुलित दृष्टिकोण अपनाउनु नै स्वस्थ समाजको संकेत हुने उनीहरूको धारणा छ।
