विषम परिस्थितिमा संयम र नेतृत्व प्रदर्शन गर्ने प्रहरी नेतृत्वलाई सलाम : एसएसपी रमेश थापा

पुरस्कार, सम्मान र प्रशंसा प्रायः असल कर्म र त्यस क्रममा निर्वाह गरिएको जिम्मेवारीको कदरस्वरूप प्रदान गरिन्छ। कहिलेकाहीँ यो परम्पराको निरन्तरता पनि हुन सक्छ। तर, सम्मानको परम्परालाई सार्थक बनाउने आधार भनेको सम्बन्धित व्यक्तिले गरेको राम्रो काम नै हो।

यही परम्परालाई निरन्तरता दिँदै नेपाल प्रहरीले ७१औँ प्रहरी दिवस–२०८३ मनाएको छ। यस अवसरमा पुरस्कृत, सम्मानित तथा प्रशंसित सम्पूर्ण प्रहरी कर्मचारीहरूलाई हार्दिक बधाई तथा शुभकामना व्यक्त गर्दछु।

यस वर्ष प्रशंसापत्रसहित सम्मानित व्यक्तिहरूमध्ये मेरो मन विशेष रूपमा छोएको नाम हो— एसएसपी रमेश थापा।

गत भदौ २३ र २४ गतेको घटनापछि देशको राजधानी काठमाडौंले गम्भीर सुरक्षा चुनौतीको सामना गर्नुपरेको थियो। एकातिर भ्रष्टाचारविरुद्ध शान्तिपूर्ण रूपमा सडकमा उत्रिएका युवामाथि भएको हिंसात्मक घटनाले आम नागरिकमा आक्रोश उत्पन्न गराएको थियो भने अर्कोतर्फ त्यही आक्रोशको आडमा प्रहरी कर्मचारीमाथि भौतिक आक्रमण र प्रहरी कार्यालयहरूमा तोडफोड तथा आगजनीका घटना भएका थिए। यस्तो विषम परिस्थितिले प्रहरी संगठनभित्र समेत अन्योल, त्रास र निराशाको वातावरण सिर्जना गरेको थियो।

यस्तो संवेदनशील समयमा प्रहरी संगठनको मनोबल कायम राख्नु, राजधानीको सुरक्षा व्यवस्था पुनः सामान्य बनाउनु र नागरिकमा सुरक्षाको भरोसा जगाउनु निकै चुनौतीपूर्ण जिम्मेवारी थियो। तत्कालीन काठमाडौं उपत्यका प्रहरी प्रमुख, हालका प्रहरी महानिरीक्षक (आईजीपी) दानबहादुर कार्कीको नेतृत्व र निर्देशनमा रहेर एसएसपी रमेश थापाले निर्वाह गर्नुभएको भूमिका यस सन्दर्भमा उल्लेखनीय रह्यो।

विषम परिस्थितिमा जिम्मेवारीपूर्वक काम गर्दै राजधानीको सुरक्षा अवस्था सुधार गर्न, प्रहरी संगठनलाई पुनः व्यवस्थित बनाउन र समाजमा प्रहरीप्रतिको विश्वास कायम राख्न उहाँले निर्वाह गर्नुभएको भूमिकाको कदर गर्दै प्रदान गरिएको सम्मानले मलाई विशेष रूपमा छोयो।

त्यो सम्मान केवल एक व्यक्तिले प्राप्त गरेको प्रशंसापत्र मात्र थिएन; कठिन परिस्थितिमा जिम्मेवारी निर्वाह गर्ने प्रहरी कर्मचारीको मनोबल बढाउने र राम्रो कामको कदर गर्ने नेतृत्वको सकारात्मक सोचको प्रतिबिम्ब पनि थियो। चुनौतीपूर्ण समयमा आफ्नो मातहतका कर्मचारीले गरेको कामको पहिचान गर्दै उनीहरूलाई सम्मान र प्रोत्साहन दिनु नेतृत्वको महत्त्वपूर्ण गुण हो।

झन्, आफ्नी आमालाई गुमाउनुको पीडा कम नहुँदै राजधानीले सामना गरिरहेको गम्भीर सुरक्षा चुनौती न्यूनीकरण गर्न खटिएर सकारात्मक परिणाम हासिल गर्न भूमिका निर्वाह गर्नु एसएसपी रमेश थापाका लागि व्यक्तिगत रूपमा पनि कठिन समय थियो। यस्तो अवस्थामा जिम्मेवारीप्रतिको प्रतिबद्धता देखाउँदै कार्यक्षेत्रमा सक्रिय रहनुभएको उहाँप्रति विशेष सम्मान व्यक्त गर्न चाहन्छु।

कठिन समयमा नेतृत्वको वास्तविक परीक्षा हुन्छ। चुनौतीका बीच संयम कायम राख्ने, जिम्मेवारीबाट पछि नहट्ने र साझा लक्ष्य प्राप्तिका लागि आफ्नो टोलीलाई अघि बढाउने नेतृत्व नै संगठनको बलियो आधार हो। त्यस्तै, राम्रो काम गर्ने कर्मचारीको योगदान पहिचान गरी सम्मानित गर्ने नेतृत्वले संगठनभित्र उत्साह, आत्मविश्वास र सकारात्मक कार्यसंस्कृति निर्माण गर्न मद्दत गर्छ।

एसएसपी रमेश थापाको योगदानको कदर गर्दै उहाँलाई सम्मानित गर्ने प्रहरी नेतृत्वप्रति धन्यवाद व्यक्त गर्दछु। साथै, त्यस कठिन समयमा जिम्मेवारी निर्वाह गर्ने एसएसपी रमेश थापालगायत सम्पूर्ण प्रहरी कर्मचारीहरूप्रति हृदयदेखि सम्मान र सलाम व्यक्त गर्दछु।

विषम परिस्थितिमा संयम, जिम्मेवारीमा प्रतिबद्धता र नेतृत्वमा संवेदनशीलता—यस्तै गुणले संगठनलाई बलियो बनाउँछ।

हार्दिक बधाई तथा शुभकामना!